Takimi i radhës i KKRT-së dhe OSBE-së me subjektet radio-televizive të rretheve të jugut të vendit u mbajt sot në qytetin e Vlorës. Pyetjet që u bënë nga pronarët e mediave lokale morën përgjigje të drejtpërdrejta jo vetëm nga drejtuesit e KKRT-së, por edhe nga ata të OSBE-së, që inicuan dhe mbështetën tërë këtë tur informimi.   

KKRT-ja dhe OSBE-ja nisën nga qyteti i Korçës, informimin e  transmetuesve lokalë për Projekt - Strategjinë e Kalimit në transmetimet numerike e njëkohësisht, diskutimin për ndikimin që ajo do të ketë tek ata. Në ftesën e përbashkët, që Kryetarja e KKRT-së, znj.Mesila Doda dhe Ambasadori i Prezencës së OSBE-së në Shqipërisë, z. Robert Bosch, u dërguan transmetuesve, thuhej: ″Kemi kënaqësinë t’ju ftojmë të merrni pjesë në një forum informimi dhe diskutimi të organizuar nga KKRT-ja në bashkëpunim me Prezencën e OSBE-së në Shqipëri. 

     Këshilli Kombëtar i Radios dhe Televizionit përfundon projektin e parë të Strategjisë së kalimit të transmetimeve analoge në dixhitale dhe së shpejti, do t’ia prezantojë atë institucioneve më të larta të vendit dhe të huaja. Këtë fakt e bëri të ditur sot, Kryetarja e KKRT-së, znj.Mesila Doda, në një konferencë për shtyp. Me këtë punë të kryer, me këtë draft të përfunduar,  tha znj.Doda,  hapet faza e dytë e  përfundimit të kësaj strategjie e njëkohësisht, jemi në sikron me të gjitha vlerësimet e bëra nga Komisioni Evropian, në të cilat theksohet se ka pasur progres për sa i  përket politikave audiovizuale