KKRT-ja po hedh hapat e parë konkretë për të realizuar në vend,  kalimin nga sistemi analog i transmetimeve audio-vizive në sistemin dixhital (numerik).“Shenjuesi” i këtij procesi do të jetë konferenca kombëtare me titull “Shqipëria dixhitale – sfida e së ardhmes” që do të mblidhet për këtë qëllim, ditën e premte, më 18 prill 2008 në Tiranë. Konferenca është organizuar nga KKRT-ja në bashkëpunim të ngushtë me OSBE-në.

     Përfaqësues të Kuvendit të Shqipërisë, qeverisë shqiptare, institucioneve të huaja ndërkombëtare si dhe të komunitetit të medias, janë ftuar për të marrë pjesë në të; prej tyre pritet një mbështetje e gjithanshme me ide dhe veprime për të përfshirë edhe Shqipërinë në radhën e vendeve evropiane, që po punojnë për të kaluar transmetimet audio-vizive në sistemin dixhital brenda vitit 2012. Shumë risi priten në këtë fushë tani e tutje. Procesi i këshillimit publik të KKRT-së me të gjithë aktorët e interesuar për të bërë kalimin në sistemin numerik sapo ka filluar; propozimet e cilitdo do të merren në konsideratë dhe do të konsiderohen të vlefshme. 
     KKRT-ja ka hapur në faqen e saj të internetit, një rubrikë të re: “Dixhitalizimi”, e cila do të pasurohet vazhdimisht. Së shpejti, në kuadrin e këshillimit publik, do të vendoset edhe një pyetësor që do të synojë më së shumti, dhënien e ideve për ta bërë sa më praktik, lehtësisht të zbatueshëm, kalimin në sistemin dixhital.
     Media është e ftuar ta pasqyrojë këtë aktivitet të parë, të plotë e gjithpërfshirës, që do të zhvillohet më 18 prill në hotel “Sheraton”, në sallën “Illyria I”, në orën 9.00.

                                                                                                                                  Zëdhënësja
                                                                                                                            Armanda Shtëmbari