Në prani të mediave, Këshilli Kombëtar i Radios dhe Televizionit mori sot në dorëzim dokumentacionin e subjekteve që kanë kërkuar të licencohen si operatorë televizivë kombëtarë privatë. Kryetar i komisionit të vlerësimit ishte nënkryetari i KKRT-së, z.Frano Kulli, mbështetur në rregulloren “Mbi procedurat e licencimit të operatorëve privatë radio-televizivë” .

Dokumentacioni i aplikimit kërkohej të ishte i mbyllur, i vulosur dhe me mbishkrimin "Aplikim për licencë për operator kombëtar tv. analog tokësor", në përputhje me kërkesat e ligjit nr.8410, datë 30.09.1998, të ndryshuar. Me këtë dokumentacion, në konkurim u paraqitën dy subjekte: “Top Channel” dhe “Vizion Plus”, të cilët u kualifikuan për vazhdimin e mëtejshëm të garës pas plotësimit të fazës së parë të saj. Në përputhje me dispozitat ligjore në fuqi, vendimi i KKRT-së do të shpallet brenda 90 ditëve.

Zëdhënësja
Armanda Shtëmbari